ڈیفالٹ کا خطرہ ٹل گیا، آئی ایم ایف کا پاکستان سے اسٹاف لیول معاہدہ

عیدالاضحیٰ کے موقع پر عالمی مالیاتی فنڈ (آئی ایم ایف) نے پاکستانی عوام کو خوشخبری سنا دی ہے. عالمی مالیاتی فنڈ نے پاکستان سے اسٹاف لیول معاہدہ کر لیا ہے.

تفصیلات کے مطابق پاکستان اور آئی ایم ایف کا 3 ارب ڈالرز اسٹینڈ بائی ارینجمنٹ کا معاہدہ ہوا ہے. حال ہی میں آئی ایم ایف کی جانب سے پاکستان کے ساتھ 3 ارب ڈالرز کا اسٹاف لیول معاہدہ کرنے کا اعلان کیا گیا ہے.

اس حوالے سے عالمی مالیاتی فنڈ کا کہنا ہے کہ پاکستان کے ساتھ 9 ماہ کا اسٹینڈ بائی معاہدہ طے پایا ہے. آئی ایم ایف کی جانب سے جاری کردہ اعلامیے کے مطابق یہ سٹاف لیول معاہدہ پاکستان کی بیرونی ادائیگیوں کا دباؤ کم کرے گا. معاہدے سے سماجی شعبے کے لیے فنڈز کی فراہمی بہتر ہو گی۔

اعلامیے میں مزید کہا گیا ہے کہ معاہدہ پاکستان میں ٹیکسز کی آمدن بڑھائے گا. ٹیکس کی آمدن بڑھنے سے عوام کی ترقی کے لیے فنڈنگ بڑھ سکے گی اور یہ معاہدہ پاکستان میں مالی نظم و ضبط کا باعث بنے گا.

آئی ایم ایف نے اعلامیے میں مزید کہا ہے کہ معاہدے سے توانائی کی اصلاحات یقینی بنائی جائیں گی. ایکس چینج ریٹ کو مارکیٹ کے حساب سے مقرر کیا جائے گا. معاہدے سے پاکستان کو بیرونی ممالک اور مالیاتی اداروں سے فنانسنگ دستیاب ہوسکے گی.

آئی ایم ایف کا کہنا ہے کہ موجودہ معاشی مسائل کو حل کرنے کے لیے پالیسیوں پر سختی سے عمل درآمد ضروری ہے. پاکستان سے کہا ہے کہ توانائی کے شعبے میں اصلاحات کی جائیں.

واضح رہے کہ آئی ایم ایف ایگزیکٹیو بورڈ اسٹاف لیول معاہدے کی منظوری دے گا، ایگزیکٹیو بورڈ کا اجلاس جولائی کے وسط میں ہو گا۔

ذرائع نے بتایا ہے کہ پاکستان کو یہ رقم قسطوں میں ملنے کا امکان ہے۔ اس سے قبل ایک بیان میں وزیرِ خزانہ اسحاق ڈار نے کہا تھا کہ آئی ایم ایف سے معاہدہ 24 گھنٹے میں متوقع ہے، بیل آؤٹ معاہدے کے قریب ہیں۔